Barreiros, xuño de 2026. A Asociación Guillem Veiga Iglesias, en colaboración coa Área de Mocidade da Vicepresidencia da Deputación de Lugo e o Concello de Barreiros, presenta “Noites Alternativas”, un novo programa de ocio nocturno inclusivo dirixido á xente nova da Mariña.
O programa busca ofrecer un espazo de encontro onde a xuventude poida participar, convivir e expresarse a través de propostas culturais e artísticas, afastadas dos modelos de ocio nocturno tradicionais.
A iniciativa desenvolverase durante os meses de xullo e agosto, convertendo os xoves pola noite nunha cita destacada do verán para a mocidade de entre 13 e 18 anos.
Entre as actividades inclúense obradoiros de rap e cultura urbana, graffiti e expresión artística, e outras propostas lúdicas como desafíos en equipo.
“Noites Alternativas” quere fomentar a participación xuvenil, a creatividade, a convivencia e o respecto pola diversidade, consolidándose como unha proposta innovadora de ocio alternativo.
